"Чингис хаан-2012” дэлхийн цомын аварга шалгаруулах жүдо бөхийн тэмцээний анхны алтан медалийг Д.Амартүвшин хүртлээ.  

Тэрээр хагас шигшээд барилдаанд Г.Болдбаатарыг цэвэр ялснаар алтан медалийн төлөө барилдах эрхтэй болсон юм. Финалд БНСУ-ын бөх Ким Вон Жинтэй барилдаж барилдааны үндсэн цагт хэн хэн нь оноо аваагүй. Нэмэлт цаг сунгаж барилдахад манай бөх вазари үнэлгээ авснаар алтан медаль хүртлээ. Ч.Болдбаатар АНУ-ын бөх Коссор Николасыг ялснаар хүрэл медалийн эзэн боллоо. Г.Болдбаатар Хонконгийн бөхийг ялж хүрэл медалийн тавцанд зогслоо. 
Алтан медалийн эзэн болсон Д.Амартүвшингийн сэтгэгдлийг сонирхлоо. 

-"Чингис хаан-2012” дэлхийн цомын цуврал тэмцээнд түрүүлсэнд баяр хүргэе?
-Баярлалаа. 

-Өрсөлдөгчид хэр байв?
-Чанга байлаа. Болдоотой хийсэн барилдаан, финалд Солонгосын бөхтэй хийсэн барилдаан гээд хүндхэн даваанууд байлаа. 

-Энэхүү тэмцээн манай улсад дөрөв дэх удаагаа зохион байгуулагдаж байгаа. Өмнө нь ямар амжилт гаргаж байсан бэ?
- 2010 оны дэлхийн цомоос хүрэл медаль хүртэж байсан. Өнгөрсөн онд гэмтлийн улмаас оролцож чадаагүй. Тийм учраас энэ жил амжилтаа ахиулж түрүүлсэндээ баяртай байна. 

-2016 оны Бразилийн олимпийн эрхийн оноо цуглуулах анхны тэмцээн шүү дээ. Гараагаа сайн эхлүүлсэн чигээрээ оноогоо цуглуулж Бразилийн татамид зодоглох болтугай?
- Баярлалаа. Цаашдаа бэлтгэл сургуулилтаа базааж сайн барилдах болно оо. 

Б.Ирээдүй